Ven a Nigrán
Situado no corazón do Val Miñor, ao sur da provincia de Pontevedra, é un dos segredos mellor gardados das Rías Baixas. Nigrán é un municipio de 35 km2, duns 18.000 habitantes repartidos en sete parroquias: Nigrán, Panxón, San Pedro, Parada, Camos, Chandebrito e Priegue, que practicamente triplica a súa poboación nos meses de verán.
Rodéano os municipios de Vigo, Gondomar e Baiona, polo Norte, Leste e Sur, respectivamente. Ao Oeste atópanse a ría de Vigo e o Océano Atlántico
Dista 98 km de Santiago de Compostela pola autoestrada, 20 km da fronteira con Portugal e 12 km de Vigo, a cidade máis importante de Galicia. O seu enclave xeográfico e as excelentes comunicacións permiten o acceso ao municipio por terra, mar e aire.
O seu clima tépedo e unha orografía rica en contrastes permítenlle a este municipio ofrecer moitas posibilidades de lecer e goce. O relevo nigranés é suave, pois as cotas máis altas apenas alcanzan os 500 metros e os seus vales son amplos. A súa costa ofrécenos areais inmensos como Praia América, pero tamén áreas de bosque nos montes de Chandebrito, Camos, Monte Castelo, ou á mesma beira do mar, como sucede con Monteferro.
Dous ríos desembocan na súa costa: o Miñor, que o fai no extremo suroccidental do municipio, creando un esteiro que se converte en marisma, espazo natural de singular beleza; e o pequeno río Muíños, que remata a súa viaxe en Praia América.
O noso patrimonio cultural e natural, a nosa historia, a nosa gastronomía e a nosa hospitalidade agardan por ti.
