Partindo da súa desembocadura en Praia América, ímos cara ao inerior por un frondoso bosque galería ata o Porto do Molle, parque empresarial de Nigrán, que bordearemos para volver de novo á ribeira do río Muíños.
Patrimonio histórico
Ao longo desta ruta temos a posibilidade de atopar varias mostras de muíños hidráulicos que servían para moer o gran e transformalo en fariña.
A presenza deste patrimonio etnográfico contrasta co Parque Empresarial Porto do Molle, última parte do percorrido da ruta, mostra do desenvolvemento tecnolóxico de Nigrán.
Patrimonio natural
Este carreiro parte desde a desembocadura do río no ENIL Praia América-Panxón para continuar por un bosque de ribeira. Este bosque está limitado a unhas bandas lineais ao longo da canle, xa que a maior parte se eliminou para o seu aproveitamento como prado ou cultivo. Esta transformación é máis patente no curso baixo e medio do río, zona que percorre este carreiro, estando o curso alto ben conservado.
Aínda así, a vexetación de ribeira típica está ben representada por amieiros, salgueiros, freixos, bidueiros e loureiros no curso baixo; no curso medio xa se aprecia unha pequena transición, pois tamén podemos atopar carballos e abeleiras. Neste bosque está presente a hedra atlántica (Hedera hibernica), especie robusta que se distribúe desde Escocia ata o sur de Portugal por toda a fronte atlántica. Ao chegar á altura do cruce deste carreiro coa autovía AG 57- N chaman a atención no río unha serie de filamentos de cor laranxa, que poderían ser confundidos con verteduras contaminantes; con todo, trátase dun proceso natural: en augas con alto contido en ferro poden proliferar unhas bacterias filamentosas coñecidas como “bacterias oxidantes do ferro”.
