Comezamos a ruta na Rúa da Igrexa ao pé do Monte do Castro. Subimos ata o seu miradoiro para gozar das vistas e baixamos ata os muíños hidráulicos de Regueiro, aínda en uso. Desde alí dirixirémonos dirección Colexio Estudio. Pasaremos por varios petróglifos. Logo baixaremos ata os Muiños de Rodas, abandonados pero dunha beleza espectacular pola súa contorna, encarando desde alí a subida de novo cara ao punto de partida no Monte do Castro.
Patrimonio histórico
O carreiro comeza na chaira que se sitúa debaixo do Monte de O Castro, á beira do muíño de As Chans e onde quedan en pé dúas cruces dun antigo Via Crucis. Durante o descenso do miradoiro por unha pasarela de madeira teremos a posibilidade de ver varios muíños hidráulicos. Non serán os únicos que poderemos ver ao longo da ruta.
Posteriormente, durante o percorrido, atoparemos dous petróglifos (un chamado Chan de Preguntadouro, ao que se accede por un desvío antes de chegar ao colexio, e outro a uns 300 metros denominado Chan de Rapadouro). Para poder observalos mellor e ver os seus gravados, recoméndase facelo á primeira hora do día ou a última para que os raios de sol non incidan directamente sobre eles e se cree unha sombra.
Patrimonio natural
O carreiro mestura tramos de monte baixo composto de toxos (Ulex sp), breixos (Erica sp.), fentos (Pteridium aquilinum) e Cytisus onde se intercalan pequenas plantacións de piñeiro e eucalipto, coa posibilidade de coñecer un ecosistema forestal fantástico situado nas marxes do río Rodas, afluente do río Muíños, un exemplo de bosque húmido atlántico. Nel podemos atopar as especies típicas como carballos, loureiros e amieiros que propician un ambiente nemoral de humidade e sombra ao longo do verán que xustifica a alta densidade e diversidade de fentos como Dryopteris filix, e a conservación de anfibios tan interesantes como a píntega rabilarga (Chioglossa lusitanica), especie de distribución restrinxida ao NO da Península Ibérica.
