O alcalde de Nigrán, Alberto Valverde, a concelleira de Educación, Carmen Alonso-Macías, e a Xefa de Servizo de Aqualia en Nigrán, Marián Lago, fixeron entrega do premio do XII Concurso Internacional de Debuxo infantil de FCC-Aqualia, a tres alumnos do Colexio Estudo, finalistas deste concurso, que ten como obxectivo concienciar aos máis pequenos da importancia de coidar a auga, un ben natural caro, prezado e escaso en moitos puntos do planeta.
Os finalistas desta edición, Mario Larrondo, Claudia de Sas e Juan Ojea, que cursan na actualidade 4º de primaria, recibiron como premio tres unidades do xogo “Mundo sumerxido”, un acuario de auga doce con periscopio para observar máis de preto a vida subacuática.
O rexedor municipal felicitou a todos os alumnos participantes, e de forma especial aos finalistas, que baixo a lema “a auga necesita heroes como ti” deseñaron un cómic de tres viñetas sobre o uso responsable da auga, que elaboraron a través da plataforma Web do concurso e que se poden ver no link http://www.heroesdelagua.es/inicio.
Así mesmo, aplaudiu esta iniciativa, que ten como obxectivo educar aos máis pequenos nun consumo sustentable da auga, e fomentar un uso racional deste recurso.
