O goberno municipal inicia o acondicionamento e mellora dos lavadoiros catalogados no inventario municipal. Tras a redacción dun proxecto técnico, o goberno municipal acometerá esta actuación que contempla a reparación e posta a punto de 27 lavadoiros públicos das sete parroquias do municipio, moi deteriorados polo paso do tempo e a falta de mantemento acumulado ao longo dos anos.
As actuacións, executadas por operarios municipais e que se realizarán de forma progresiva, consistirán en tarefas de limpeza das estruturas, cubertas, muros, accesos e a contorna dos lavadoiros, así como na reparación daqueles elementos danados pola corrosión da auga ou polo seu uso.
Con esta actuación, o goberno local recuperará estas infraestruturas municipais, “mellorando o seu estado actual pero, sobre todo, garantindo a súa conservación”, puntualiza o alcalde, Alberto Valverde.
