Nigrán conta desde hoxe mesmo co portelo único no propio concello, “un novo servizo que permitirá aos veciños de Nigrán realizar calquera trámite con outras administracións sen necesidade de desprazarse a outros municipios veciños”, sinala alcalde de Nigrán, Alberto Valverde, que engade que é un compromiso político adquirido e cumprido.
A oficina habilitarase no propio Rexistro Municipal, na planta baixa do concello, e permanecerá aberta ao público en horario de 9.00 a 14.00 horas. “A apertura do portelo único en Nigrán simplificará e axilizará a realización de diversos trámites aos veciños ante outras administracións, evitando que sufran as consecuencias da dispersión espacial imposta pola estrutura das diferentes administracións e a complexo organigrama de cada unha delas”, observa Valverde.
Simplificar e facilitar a realización de trámites e outras xestións aos veciños de Nigrán é un dos obxectivos que se impón o equipo de goberno no seu día, ”polo que a posta en marcha deste servizo é unha magnífica noticia para os nosos veciños”, apunta.
A este servizo súmase a posibilidade de tramitar o DNI nas dependencias municipais, previa cita a través da Policía Local, “evitando os prexuízos e o gasto que desprazarse a outros municipios próximos xeraba aos nosos veciños”, así como a adhesión a un convenio de colaboración entre a FEMP e a DXT, que permite aos veciños de Nigrán realizar a tramitación do cambio de domicilio nos seus permisos de condución e circulación sen necesidade de desprazarse á Xefatura de Tráfico de Vigo.
Neste sentido, o rexedor municipal informa que nos próximos días porase a disposición dos veciños a través da páxina Web municipal diversos formularios para a realización de trámites co Departamento de Urbanismo, “que até a data había que solicitar en instancias municipais”, engade.
“A habilitación dun sistema de pasarela de pagos para o abono de taxas ou tributos vía internet e o portelo único online son os próximos obxectivos do goberno municipal para ofrecer un mellor servizo e atención aos nosos veciños”, conclúe Valverde.
