Os tres meses de exposición pública do PXOM finalizaron onte cun saldo dunhas 1.200 alegacións presentadas no Rexistro Municipal. Así mesmo, neste período os técnicos municipais atenderon a máis dun milleiro de veciños con dúbidas e consultas sobre o plan de ordenación urbanística, “unhas cifras que pechan esta fase da tramitación do PXOM cun saldo positivo e que reflicten o esforzo realizado polos técnicos desta casa, aos que agradezo profundamente a súa dedicación e traballo, especialmente no últimos tres meses”, apunta o alcalde de Nigrán, Alberto Valverde.
A finalización da exposición pública abre unha nova etapa na tramitación do documento de ordenación urbanística, que concluirá coa aprobación provisional do documento. “Os técnicos municipais están desde o día de hoxe clasificando todas as alegacións recibidas, para remitilas posteriormente á empresa redactora, que é a entidade responsable de informar sobre elas”, explica o rexedor municipal.
Paralelamente, a administración local está pendente de recibir os últimos informes sectoriais do documento, “que xunto coas alegacións informadas pola empresa redactora, incorporaranse ao documento que levará a aprobación provisional en sesión plenaria”, agrega Valverde.
O rexedor municipal subliña a importancia da fase que a tramitación do PXOM deixa atrás, na que os veciños han realizados unhas achegas que sen dúbida mellorarán o documento. Así mesmo, insiste na importancia desta nova fase do procedemento de aprobación do Plan Xeral, e reitera o manifestado en etapas anterior, tranquilidade e normalidade absoluta ao redor da tramitación do plan. “As alegacións recibidas e correctamente informadas pola empresa redactora enriquecerán o documento de ordenación de Nigrán, que sentará as bases para que este municipio creza, dunha vez por todas, de forma ordenada e sustentable”, observa.
Así mesmo, Valverde fai un chamamento á responsabilidade a todos os membros da corporación municipal. “Desde o goberno municipal brindamos a man ao resto da corporación a traballar con responsabilidade para dotar a Nigrán dun marco urbanístico adecuado. Neste momento non caben cuestións políticas, polo que esperamos contar coa súa presenza nas reunións de traballo sobre o PXOM para, de darlle a este municipio e aos seus veciños o Nigrán que se merecen”, sinala.
