Máis de 1.300 persoas desfilarán no concurso de comparsas de Nigrán

A Avenida de Praia América acollerá na tarde de mañá o concurso de comparsas, posposto até en dúas ocasións polas fortes choivas. O desfile, que arrincará ás 19.00 horas, contará coa participación de máis de 1.300 persoas e quince comparsas, aínda que só catorce optarán aos 2.850 euros en premios.

A comitiva desfilará desde a zona de Monte Lourido en dirección á chaira de Praia América, onde se situarán os membros do xurado. Entre as comparsas inscritas atópanse “Piratadas por un tubo”, da escola de danza Marcando Pasos e a Asociación de Veciños A Unión de San Pedro; a comitiva “Ciklon”, de Tomiño; “Moulin Rouge”, de Mos; “Os terribles de Tebra”, de Tomiño; “Sete artes para un entroido”, de Mañufe; “Fantasía de primaveira”, da Asociación de Veciños Parada Miñor; e “O imperio do rei escorpión”, de Gondomar.