Autoemprego
Apoio á cultura emprendedora
O asesoramento para emprendedores constitúe unha das bases do servizo que presta a AEDL. Abarca a totalidade de aspectos precisos para a posta en marcha dunha empresa, incluíndo unha orientación xeral da idea que pode concretarse naqueles aspectos especificamente demandados polos usuarios (formas xurídicas e trámites de constitución, formación adecuada para ampliar os coñecementos dos promotores, contratación…).
Dentro destas consultas debemos destacar como a máis frecuente a existencia de subvencións e axudas públicas para a posta en marcha das actividades empresariais e os trámites precisos para a súa solicitude. Estas tarefas realizásense ao longo de todo o ano, tendo especial importancia as accións realizadas durante os meses en que están abertas as convocatorias públicas de subvencións, xa que adoita coincidir coa época de máis solicitudes de información.
Neste, como noutros campos, non se pode perder de vista que a estacionalidade dalgúns dos principais sectores económicos da zona inflúen directamente no achegamento aos servizos municipais de asesoramento. Este apartado tamén recolle a posibilidade de organizar cursos e impartir charlas presentando o autoemprego como saída laboral, a petición de centros de formación, asociacións e, en xeral, de calquera agrupación interesada en difundir esta opción de traballo como unha posibilidade real e atractiva para o desenvolvemento profesional.
Dinamización empresarial
O ente municipal quere manter unha relación fluída e constante non só cos potenciais emprendedores, senón tamén con empresas recentemente instaladas, asociacións empresariais, empresas xa en funcionamento…
Un dos temas máis frecuentemente tratados entre estas entidades e o concello é a solicitude de información e asesoramento sobre aquelas liñas de axudas que distintos organismos convocan para esta tipoloxía empresarial, sendo o IGAPE o que máis relevancia ten neste campo.
Ademais, é fundamental destacar que establecer e manter un vínculo directo coa Asociación de Empresarios “ OVALMI” e o Polígono de Porto do Molle e crear conxuntamente con eles programas que fomenten o emprego, resulta fundamental para garantir estar en contacto permanente cos dous eixos empresariais máis importantes non só de Nigrán, senón de toda a comarca do Val Miñor.
