O goberno municipal presenta as súas candidaturas para os Premios Nigrán 2014

O goberno municipal presenta as súas candidaturas para os Premios Nigrán 2014, que se celebrarán o vindeiro venres 9 de maio ás 20.00 horas no Salón de Actos municipal. A proposta do equipo de Valverde será sometida a votación o vindeiro martes 8 de abril, ante unha comisión composta polo alcalde, dous portavoces do PP, dous portavoces do PSOE, un portavoz en representación do grupo mixto e unha funcionaria municipal.

As candidaturas expostas polo goberno municipal son froito todas as propostas presentadas por colectivos e asociacións culturais, sociais e deportivas de Nigrán, así como polos grupos políticos da corporación, “unhas candidaturas que responden ao sentir de todos os colectivos e cores políticas do municipio”, subliña o rexedor municipal.

Entre os postulados polo goberno municipal atópanse a Asociación Española Contra o Cancro-Val Miñor, na categoría social, polo seu inestimable labor na loita contra unha das grandes secuelas da sociedade moderna na comarca desde o ano 1998; o Centro Cultural e Recreativo “O Torreiro” de Priegue na categoría cultural, que este ano celebra o seu corenta aniversario; e o CPI de Panxón como premio ao mérito educativo, por ser o centro escolar máis antigo do municipio, formando e educando a moitas xeracións de nigranenses desde o primeiro terzo do século XX.

Na categoría deportiva, o goberno municipal propón ao tres clubs de birlo celta de Nigrán, o de Ceán, o da Carrasca e o de Camos, tres entidades deportivas que desde hai anos pon en valor unha actividade deportiva tradicional, e que, grazas aos éxitos deportivos cultivados, converteron a Nigrán na capital nacional do birlo celta.

Como premio ao mérito empresarial o equipo de goberno propón á Panadaría A Pintora, que este ano celebra o seu 130 aniversario, pola lonxeva traxectoria dun negocio que segue vivo máis dun século despois da súa fundación, baixo a batuta da cuarta xeración familiar. As candidaturas do goberno presentan como candidato ao premio á innovación á empresa dedicada ás Enerxías Renovables Polyper Genève, unha das mellores do sector a nivel galego, que a través da súa actividade fomenta valores de respeto e concienciación ambiental.

Premios Nigrán
Na súa terceira edición, os Premios Nigrán, un acto institucional iniciativa do actual goberno, consolídanse como un instrumento de recoñecemento público ao esforzo de persoas particulares, colectivos, asociacións e empresas do municipio nas áreas social, cultural, educativa, deportiva, empresarial e innovación, no camiño da construción conxunta dunha cidadanía cohesionada, que permitiu no pasado, e permite no presente, facer de Nigrán un municipio puxante e unhas inigualables perspectivas de futuro.